XUSTIFICACIÓN PAMELA, ALICIA

Segundo a ORDE do 26 de abril de 2013 pola que se establecen as bases e se convocan subvencións para o desenvolvemento de programas dirixidos a redución do abandono escolar nos concellos de Galicia para o ano 2013, preséntase o seguinte proxecto para o desenvolvemento de actividades de formación non regrada que favorezan a reincorporación de mozos e mozas ao sistema educativo.

Así, pretendemos desenvolver actividades que proporcionen unha formación integral ao alumnado e, ao mesmo tempo, promover o esforzo compartido de toda a comunidade educativa na procura do éxito escolar e na redución do abandono temperán dos estudos por parte da nosa mocidade.

O motivo deste proxecto baséase na necesidade de promoción dos mozos e mozas de entre 16 e 24 anos que non obtiveron o graduado en educación secundaria obrigatoria (ESO) ou superior polo abandono do sistema educativo.

 No Concello de Bergondo a poboación nova no ano 2013 representa o 30% dos habitantes totais, entre os cales o 25% non conta co graduado na ESO polo que se aprecia unha necesidade e unha demanda de solventar esta situación. Unha das principais causas do prematuro abandono escolar foi a incorporación temperá ao mercado laboral provocando un desapego do sistema educativo. Pero moitos destes mozos e mozas na actualidade encóntranse en situación de desemprego polo que necesitan retomar os seus estudos como unha oportunidade de promoción educativa e profesional.

O Concello de Bergondo tamén se apoia na lexislación actual para promover o benestar da súa poboación a través de este proxecto amparándose entre outras cousas no artigo 27 da Constitución española que establece “o dereito de todos á educación  e asigna aos poderes públicos a obriga de garantir este dereito” permitindo “acadar uns niveis altos de calidade, independentemente das condicións sociais, culturais e económicas da familia e do contorno”.

En base a isto promovemos este programa de actividades educativas para favorecer a reincorporación da poboación destinataria ao sistema educativo, cunha previsión de éxito importante pola alta demanda detectada- a través de asociacións, dos distintos membros da comunidade educativa…- e o interese mostrado polas familias, a nivel colectivo e individual, por contar cun proxecto acorde ás necesidades descritas.

A metodoloxía a seguir para este proxecto será participativa, activa e con compoñentes lúdicos, co fin de:

1.- Cubrir as necesidades do colectivo destinatario proporcionándolles medios materiais e humanos para a preparación das probas libres.

2.- Promover as relacións interpersoais entre os compañeiros e compañeiras nun marco de liberdade, autonomía, creatividade, comunicación e esforzo automotivado, a través da realización de diferentes talleres.

Para un bo desenvolvemento do proxecto contarase con instalacións e persoal capacitado ademais de novas tecnoloxías a disposición dos beneficiarios e beneficiarias.

Todo isto levarase a cabo dende unha perspectiva obxectiva e reflexiva, fomentando a participación social e o traballo colaborativo entre os mozos e mozas de Bergondo, a través dunhas actividades de formación non regrada que busquen a incorporación ao sistema educativo así como a implicación das familias en xornadas, reunións e asembleas.